Рождественский пост - молитвы на каждый день
Канон предпразднству Рождества Христова
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.
Слава Тебе, Боже наш, слава Тебе.
Написа́лся еси́ ке́саревым повеле́нием,/ хотя́ написа́ти в кни́зе жи́зни, Всецарю́, челове́ка;/ стра́нно во Своя́ прише́л еси́,/ лю́те устра́ньшагося от рая́ на Не́бо призыва́я.
Слава Тебе, Боже наш, слава Тебе.
Написа́лся еси́ ке́саревым повеле́нием,/ хотя́ написа́ти в кни́зе жи́зни, Всецарю́, челове́ка;/ стра́нно во Своя́ прише́л еси́,/ лю́те устра́ньшагося от рая́ на Не́бо призыва́я.
Слава Отцу и Сыну и Святому Духу.
Вифлее́ме, приими́ Христа́,/ к тебе́ бо Воплоти́выйся прихо́дит, Еде́м отверза́я мне;/ угото́вися, верте́пе, Невмести́маго узри́ши, вмеща́ющася в тебе́ пресла́вно,/ бога́тством благоутро́бия ны́не обнища́вша.
И ныне и присно и во веки веков. Аминь.
Роди́тися гряде́т Христо́с,/ стра́нное возрожде́ние су́щим из Ада́ма я́ко Бог да́руя./ Возвесели́ся, пусты́не неражда́ющая, земны́х естество́ все:/ прии́де бо Влады́ка тя многоча́дну соде́яти.
Песнь 3
Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.
Слава Тебе, Боже наш, слава Тебе.
Уз избавля́я мя злых, Го́споди,/ пови́тися пелена́ми, я́коже младе́нец, прихо́диши, Человеколю́бче./ Покланя́юся Боже́ственному Твоему́ низхожде́нию.
Слава Тебе, Боже наш, слава Тебе.
Уз избавля́я мя злых, Го́споди,/ пови́тися пелена́ми, я́коже младе́нец, прихо́диши, Человеколю́бче./ Покланя́юся Боже́ственному Твоему́ низхожде́нию.
Слава Отцу и Сыну и Святому Духу.
В ле́то бы́вша Тя, безле́тно возсия́вша из Отца́, предгряде́т Де́ва роди́ти,/ ле́тныя разреша́юща стра́сти душ на́ших.
И ныне и присно и во веки веков. Аминь.
Иски́й мя, заблу́ждшаго преступле́нием,/ верте́п, я́коже не́бо, оби́тель сотвори́л еси́,/ оби́тели ми благоуготовля́я та́мошния,/ Ще́дре Многоми́лостиве.
Господи помилуй, Господи помилуй. Господи помилуй.
Слава Отцу и Сыну и Святому Духу и ныне и присно и во веки веков. Аминь.
Седа́лен, глас 8.
Не́бо мне показа́ся днесь земля́,/ на ней бо ражда́ется Творе́ц/ и в я́слех восклоня́ется в Вифлее́ме Иуде́йстем./ Со А́нгелы пою́т па́стырие непреста́нно:/ в Вы́шних сла́ва, мир в ми́ре;/ ви́деша бо звезду́, путеше́ствующу с волхвы́,/ ско́ро же теку́ще принести́ да́ры, зла́то, смирну и лива́н,/ я́ко всех су́щему Бо́гу, и Царю́ ве́чному, и Зижди́телю вся́ческих,/ в верте́пе за милосе́рдие ро́ждшемуся.
Песнь 4
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Слава Тебе, Боже наш, слава Тебе.
Тварь ны́не обветша́ние все отве́ржи,/ Зижди́теля, зи́ждема и обновля́юща тя, ви́дящи, мла де́нца бы́вша,/ и к пе́рвой тя добро́те возводя́ща.
Слава Тебе, Боже наш, слава Тебе.
Дивя́щеся пресла́вному Рождеству́, стоя́ху волсви́,/ путеводи́мы Боже́ственною звездо́ю,/ и ви́деша Со́лнце, восходя́щее из де́вственнаго о́блака,/ да́ры Тому́ принесо́ша.
Слава Отцу и Сыну и Святому Духу.
Се прихо́дит Де́ва, я́ко ю́ница,/ нося́щи юнца́ во чре́ве упита́ннаго, отъе́млющаго ми́ра грехи́,/ да ра́дуется тварь, пра́зднующи.
И ныне и присно и во веки веков. Аминь.
Про́поведи проро́ков, Христо́во возъявле́ние возвеща́ющия,/ прия́ша днесь коне́ц спаси́тельный:/ прии́де бо просвети́ти пло́тию во тьме бе́дствующия.
Песнь 5
Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́/ от но́щи неве́дения/ приведе́ние и́мамы.
Слава Тебе, Боже наш, слава Тебе.
Лю́дие, иногда́ во тьме седя́щии,/ да ви́дят Свет возсия́вший Невече́рний:/ Его́жe звезда́ дре́вле возвести́ огнь почита́ющим от Перси́ды царе́м.
Слава Тебе, Боже наш, слава Тебе.
Лю́дие, иногда́ во тьме седя́щии,/ да ви́дят Свет возсия́вший Невече́рний:/ Его́жe звезда́ дре́вле возвести́ огнь почита́ющим от Перси́ды царе́м.
Слава Отцу и Сыну и Святому Духу.
В ма́лый вни́ти Царь вели́кий тщи́тся верте́п,/ ума́ленна мя я́ко да возвели́чит/ и обнища́вша безме́рным бога́тством обогати́т, Пребоже́ственный.
И ныне и присно и во веки веков. Аминь.
Ны́не из Иа́кова, я́коже Валаа́м рече́, ражда́ется Христо́с:/ язы́ки же огоспо́дствует, и возвы́сится благода́тию Ца́рство Его́,/ пребыва́ющее непрее́мно.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну;/ от тли, Бо́же, мя возведи́.
Слава Тебе, Боже наш, слава Тебе.
Страннообра́зне Христо́с во Своя́ прихо́дит,/ устрани́м себе́ грехо́в и Сeго́ прии́мем,/ в кро́тких душа́х обита́ющаго.
Слава Тебе, Боже наш, слава Тебе.
Страннообра́зне Христо́с во Своя́ прихо́дит,/ устрани́м себе́ грехо́в и Сeго́ прии́мем,/ в кро́тких душа́х обита́ющаго.
Слава Отцу и Сыну и Святому Духу.
Ника́коже мале́йший во граде́х, Вифлее́ме, бу́деши:/ в тебе́ бо ражда́ется Царь и Госпо́дь,/ па́ствити лю́ди бога́тныя.
И ныне и присно и во веки веков. Аминь.
Ка́ко ма́лый Тя прии́мет верте́п, ми́ру невмести́маго, Недомы́сленне?/ Ка́ко у́зришися, Младе́нец, Отцу́ соу́мственный, Безнача́льный?
Господи помилуй, Господи помилуй. Господи помилуй.
Слава Отцу и Сыну и Святому Духу и ныне и присно и во веки веков. Аминь.
Конда́к, глас 3.
Подо́бен: Де́ва днесь:
Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.
И́кос:
Свяще́нная проро́ков рече́ния коне́ц прия́ша: се бо Де́ва ражда́ет Всесоверше́ннаго в Вифлее́ме гра́де, внутрь верте́па./ Тварь вся, новосотвори́ся, ра́дуйся и лику́й: с рабы́ пожи́ти Влады́ка всех прии́де,/ влады́чества чужда́го избавля́я ны, низведе́нныя тле́ю,/ и зри́тся я́ко Младе́нец, пелена́ми повива́емь в я́слех,/ Отроча́ Мла́до, Преве́чный Бог.
Песнь 7
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.
Слава Тебе, Боже наш, слава Тебе.
Да кропя́т свы́ше во́ду о́блацы,/ о́блаки полага́яй Себе́ че́стне на восхожде́ние о́блаком, носи́мь Де́вою,/ гряде́т возсия́ти Свет Невече́рний су́щим пре́жде помрач е́нным и бе́дствующим.
Слава Тебе, Боже наш, слава Тебе.
Да кропя́т свы́ше во́ду о́блацы,/ о́блаки полага́яй Себе́ че́стне на восхожде́ние о́блаком, носи́мь Де́вою,/ гряде́т возсия́ти Свет Невече́рний су́щим пре́жде помрач е́нным и бе́дствующим.
Слава Отцу и Сыну и Святому Духу.
Во́инство благоугото́вися Боже́ственных А́нгел/ воспе́ти неизрече́нное Госпо́дне низхожде́ние,/ волсви́, пости́гните, па́стырие, потщи́теся:/ прии́де, Ему́же належа́ше, Христо́с,/ ожида́ние язы́ков и избавле́ние.
И ныне и присно и во веки веков. Аминь.
Что́ сие́ стра́нное и велича́йшее чу́до?/ Ка́ко понесу́ Тя, нося́щаго глаго́лом вся́ческая?/ Неизглаго́ланное Рождество́, Сы́не Мой Безнача́льне,/ глаго́лаше Всечи́стая,/ Христа́ на дла́нех ужа́сно держа́щи.
Песнь 8
Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Слава Тебе, Боже наш, слава Тебе.
Высоту́ вои́стинну неизрече́ннаго та́инства, Небеса́ ра́зумом покры́вшему,/ Непоро́чная зря́щи, дивля́шеся и глаго́лаше:/ Престо́л Небе́сный пла́менствуется, Тебе́ держа́й,/ и ка́ко, Сы́не Мой, понесу́ Тя?
Слава Тебе, Боже наш, слава Тебе.
Высоту́ вои́стинну неизрече́ннаго та́инства, Небеса́ ра́зумом покры́вшему,/ Непоро́чная зря́щи, дивля́шеся и глаго́лаше:/ Престо́л Небе́сный пла́менствуется, Тебе́ держа́й,/ и ка́ко, Сы́не Мой, понесу́ Тя?
Слава Отцу и Сыну и Святому Духу.
Но́сиши Оте́ческое подо́бие, Сы́не Мой,/ и ка́ко раба́ подо́бие, обнища́в, восприя́л еси́?/ Ка́ко в я́слех восклоню́ Тя безслове́сных,/ избавля́ющаго вся от безслове́сия?/ Песносло́влю Твое́ благоутро́бие.
И ныне и присно и во веки веков. Аминь.
Ра́дуйся, вся земле́,/ се́ Христо́с приближа́ется, в Вифлее́ме ражда́яйся;/ мо́ре, возвесели́ся, проро́ческий сонм, взыгра́й, сбытие́ зря днесь Твои́х слове́с,/ и вси, ра́дуйтеся, пра́веднии.
Песнь 9
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем.
Слава Тебе, Боже наш, слава Тебе.
Да пою́т, ра́дующеся, ца́рствия вся земна́я,/ оте́чествия же язы́ков да веселя́тся;/ го́ры, и удо́лия, и хо́лми, ре́ки, мо́ре/ и вся тварь Го́спода, ны́не ро́ждшагося, велича́ет.
Слава Тебе, Боже наш, слава Тебе.
Да пою́т, ра́дующеся, ца́рствия вся земна́я,/ оте́чествия же язы́ков да веселя́тся;/ го́ры, и удо́лия, и хо́лми, ре́ки, мо́ре/ и вся тварь Го́спода, ны́не ро́ждшагося, велича́ет.
Слава Отцу и Сыну и Святому Духу.
Ви́делся еси́, я́ко мо́щно бе проро́ком Тя ви́дети;/ в после́дняя же времена́ Челове́к быв,/ всем яви́лся еси́ челове́ком, в Вифлее́ме, гра́де Иуде́йстем,/ звезда́ показу́ющи Тя звездосло́вцем, Несказа́нне.
И ныне и присно и во веки веков. Аминь.
О Ча́до Сладча́йшее, ка́ко пита́ю Тя, пита́ющаго?/ ка́ко держу Тя, держа́щаго вся ма́нием?/ ка́ко же пелена́ми повию́ повива́ющаго всю зе́млю мгло́ю?/ – вопия́ше Всечи́стая Влады́чица,/ Ю́же непреста́нно велича́ем.
Творение Софрония, патриарха Иерусалймскаго, глас 8
Вифлее́ме, угото́вися,/ благоукраси́теся, я́сли,/ верте́пе, приими́: И́стина прии́де./ Сень мимотече́, и Бог челове́ком от Де́вы яви́ся,/ вообрази́вся я́коже мы и обожи́в плоть./ Тем Ада́м обновля́ется, со Éвою зову́ще:/ на земли́ благоволе́ние яви́ся спасти́ род наш.
Comments